Rusiyeniñ işğal etilgen Qırımdan ücüm etüv telükesi daa bar, dep tüşüne Ukraina Devlet sıñır hızmetiniñ reisi Serğiy Deyneko. Bu aqta o, «RBK-Ukraina» neşirine ayttı.
«Nazariy olaraq böyle imkân bar, bu gruppirovka (Qırımdaki Rusiye ordusı – QA) vaqtınca işğal etilgen Qırımdan Ukrainağa ücüm ete bile… Askerler çekile. Amma bundan evel olğan ordu arttırılğan edi. O qadar asker, silâ ve arbiy tehnika bir kereden çıqarılmaz, bilesiñiz de», – dep ayta Sergey Dayneko.
Onıñ bildirgenine köre, Ukraina istihbaratı Rusiye ordusınıñ Qırımdan qısmen çekilgenini qayd ete.
«İstihbaratımız esnas qısmen başlağanını köre. Faqat bütün askerler çıqarılır dep aytmaq, mence, daa ertedir. Biz bu esnasnı diqqatnen közetip, cemaatçılıqqa haber etecekmiz», – dep ayttı Deyneko.
Onıñ qayd etkenine köre, Ukraina istihbaratı Voronej ve Rusiyeniñ Voronej vilâyetindeki Boguçar şeeri yaqınlarında Rusiye ordusınıñ çekilgenini körmey.
Aprelniñ 23-nde Reuters agentligi Pentagon memurına esaslanıp bildirdi ki, ABD arbiyleri Rusiye ordusınıñ Ukraina sıñırından ve işğal altındaki Qırımdan çekilgenini köre, amma bunıñnen bağlı hulâsa çıqarmağa daa azır degil.
Hatırlatamız, Rusiye Mudafaa nazirligi Rusiye Qara deñiz flotunıñ 20-den çoq gemisi Qırımdaki talimlerde iştirak etken soñ daimiy bulunuv yerlerine qayttı.
Aprelniñ 22-nde Rusiye Mudafaa nazirligi Qırımda «çeşitler arası talimlerni» keçirdi. Anda Rusiye arbiy müessisesiniñ yolbaşçısı Sergey Şoygu keldi. O, Cenübiy ve Ğarbiy arbiy okruglarında arbiy talimlerni yekünlemek qararını aldı ve ordular daimiy qaluv yerlerine qaytacaq, dep ilân etti. Qayd etilgenine köre, ordular mayısnıñ 1-ne qadar keri çekilmeli. Rusiye Mudafaa nazirligi Rusiye Cenübinde ve işğal altındaki Qırımda keçirilgen talimlerde iştirak etken ordular daimiy bulunuv yerlerine qaytıp başladı, dep bildirdi.
Aprel ayında Ukraina ve ğarbiy ittifaqdaşları 2014 senesinden berli Ukrainanıñ şarqiy sıñırlarında, işğal etilgen Qırımda, Qara ve Azaq deñizlerinde Rusiyeniñ asker sayısı iç olmağanı qadar arta, dep bildire. Moskva, Rusiye ordusınıñ Rusiyede (olar Ukrainağa ait Qırımnı da sayalar) areket etmesi diger memleketlerni, hususan Ukrainanı qasevetlendirmemeli, dep qayd ete.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
