Rusiyeniñ Qırımdaki arbiy komandanlığı Ukrayina Silâlı Quvetleriniñ Zaporijjâ yönelişinde ilerilemesi sebebinden sıñirlidir, dep bildirdi Ukrayina "Cenüp" operativ komandanlığınıñ spikeri Natalâ Ğumenük.
"Qırımdaki RF ordusınıñ komandanlığı, Qırımnıñ Rusiye akimiyeti bayağı siñirlengenini köremiz. Olar mudafaa quvetleriniñ areketini toqtatamacaqlarını añlaylar. Olar Zaporijjâ yönelişinde quvetlerimizniñ ilerilemesi qaçınılmaz olğanını añlaylar", - dep bildirdi Ğumenük.
Onıñ sözlerine köre, ruslar şimdi adamlarnı Zaporijjâ, Donetsk ve Herson vilâyetleriniñ işğal etilgen topraqlarından keçken yollarnen yollay ekenler. Bunı ise "aynı yollarnen ketecek Rusiye arbiy kolonnaları arbiy olmağan adamlar ile qarışsın" dep yapalar.
"Bu rusiyelilerniñ eñ sevimili taktikasıdır - silâsız adamlarnıñ arqasında saqlanmaq", - dep qoştı o.
İyülniñ 17-nde saba Qırımnıñ Rusiye yolbaşçısı Sergey Aksenov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.
Rusiye Naqliyat nazirligi köpür yolu zarar kördi, dep bildirdi. Telegram kanalları patlavlar aqqında yazıp, zarar körgen arabanıñ fotoresimlerini paylaşa. Rusiye tarafdarı bloger Aleksandr Talipov eki patlav aqqında yazdı – 3:04-te ve 3:20-de.
Belgorod vilâyetiniñ valisi Vâçeslav Gladkov bir qoranta çifti elâk oldı, dep bildirdi. Arabada 14 yaşında qızları da bar edi.
Ukrayına Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayına Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o, «Suspilne» izaatlarında.
RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
