Rusiyeniñ nezareti astında olğan Qırımnıñ Yuqarı mahkemesi vatandaş jurnalisti İrına Danılovıçnıñ ükmüne qarşı berilgen itinaf şikâyetiniñ baqıluvını iyünniñ 15-ne tayin etken. Bunı "Qırım esnası" uquq qoruycı teşkilâtı Danılovıçnıñ tuvğanlarına atfı etip haber etti.
Bundan evel Qırımnıñ Yuqarı mahkemesi "mudafaa aqqı bozulmalarını yoq etmek" içün davanı birinci instantsiyağa qaytarğan edi.
İrınanıñ babası Bronislav Danıdlovıçnıñ sözlerine köre, davanıñ keri qaytarılması qızına uzun müddet tibbiy yardım kösterilmegeni içün eşitme qabiliyetini ğayıp etkeni sebebinden mahkeme oturışlaranıñ bütün audio protokolları ile tanışıp olamaması ile bağlı edi. Dava Kefe şeer mahkemesine qaytarılğan soñ bozuvlarnı yoq etmek içün iç bir tedbir körülmegen, eki aftadan soñ mahkemeci Natalya Külinskaya materiallarnı kene istinaf mahkemesine yollanğan.
Martnıñ 22-nde Qırımda 7 yıl apis cezasına mahküm etilgen vatandaş jurnalisti ve emşire İrına Danılovıç "normal tibbiy tedaviylev kösterilgenine qadar ya da ölgence" quru açlıq aktsiyasını ilân etken edi.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
