Poltavada sentâbrniñ 3-nde Rusiye oquv yurtuna qarşı endirgen raketa darbesi neticesinde 54 kişi elâk oldı, 297 insan yaralandı, dep bildirdi cumaaqşamı künü Ukrayina fevqulâde vaziyetler devlet hızmeti.
«Qıdıruv-qurtaruv işleri telükesizlik tüşünilip devam ete. Büyük ihtimalnen daa beş kişi yıqıntılar astında qala», – dep aytıla haberde.
Vilâyetniñ arbiy memuriyet yolbaşçısı Pılıp Pronin Rusiyeniñ Poltavağa qarşı raketa darbesi neticesinde yaralağan 65 kişi ağır alda buluna, dep bildirdi.
Sentâbrniñ 3-nde Rusiye Poltavağa qarşı ballistik darbe endirdi. Ukrayina prezidenti Volodımır Zelenskıy oquv yurtu ve qomşu hastahanege eki ballistik raketa tüşti, dep bildirdi – Bağ institutınıñ binalarından biri qısmen yıqıldı.
Mudafaa nazirliginiñ spikeri Dmıtro Lazutkin telemarafonda Rusiye ordusı oquv yurtuna «İskanderlernen» ücüm etkendir, dep ayttı.
Yerli sakinler şeerde saba saat 9:10 ve 9:17-de patlavlar eşitti. Ukrayina Silâlı quvetleriniñ Ava küçleri ballistikanıñ darbesi aqqında haber etti. Regiondaki ava telükesi patlavlardan 2-3 daqqa ögüne ilân etildi.
Telüke sesi ve raketa darbesi arasında pek az vaqıt oldı, insanlar bomba sığınağına tahliye etile edi.
Poltava vilâyetinde üç künlik matem ilân etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
