Rusiye ordusınıñ Odesa vilâyetine qarşı bu gece darbe uçucısızlarınen yapqan ücümi neticesinde regionda zararlar bar, dep haber etti Odesa vilâyetiniñ arbiy memuriyetiniñ matbuat hızmeti.
«Ne yazıq ki, Odesa rayonında energetik infrastruktura obyektine ücüm etildi. Bir hadim yaralanıp hastahanege alındı. Memuriy bina zarar kördi. Tez söndürilgen yanğın çıqtı. Uquq qoruyıcılar rusiyelilerniñ daa bir cinayetini qayd ete», – dep aytıla haberde.
Gece devamında Kyiv ve diger regionlarda ava telükesi ilân etildi. Vilâyetlerden malümat alına. Ukrayına arbiyleriniñ malümatına köre, gece ava mudafaa quvetleri Ukrayınada 38 uçucısızdan 29-nı urıp tüşürdi.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
