Rusiyeniñ nükleer silâ qullanuv ihtimali Ukrayınanı topraq mudafaasında toqtatmaycaq, dep bildirdi Ukrayına milliy telükesizlik ve mudafaa şurasınıñ kâtibi Oleksiy Danılov Azatlıq Radiosına.
«Dünya toplulığı, NATO memleketleri böyle deşetli ücümge (Allah saqlasın, olsa) cevap bermese, toprağımıznı qorumaycaqmız manasına kelmey. Bizni kimse toqtatamaz: ne Putin, ne ordusı. Bu endi çoq kere isbatlandı», – dep qayd etti o.
Danılovnıñ aytqanına köre, Ukrayına milliy telükesizlik ve mudafaa şurası Rusiye taktik nükleer silâ qullansa, vatandaşlar içün tafsilâtlı talimat azırladı ve yaqın künleri «onı mümkün olğanı qadar çoq aydınlatmağa» niyetlene.
Sentâbrniñ 21-nde Vladimir Putin Rusiye «topraqlarını» qorumaq içün «elindeki vastalarını» qullanmağa azır, dep bildirdi. Putin işğal etken Ukrayına topraqlarını da «özüne ait» dep saya.
ABD prezidenti Joe Biden sentâbrniñ 21-nde New Yorktaki BM Baş assambleyasında çıqışta bulunıp, Putinni «Avropanı açıq-açıq nükleer silânen qorquzğanında» qabaatladı.
Sentâbrniñ 26-nda ABD prezidentiniñ milliy telükesizlik mesleatçısı Ceyk Sallivan ABD Rusiyeniñ Ukrayınağa qarşı nükleer silâ qullanmasına cevap berecek dep, Moskvağa körecek «felâketli aqibetlerini» añlattı. O, ABD cevabı nasıl olacağını aytmadı, amma Amerika Birleşken Devletleri «Moskvağa şahsiy olaraq bunıñ ne demek olğanını añlattı», dep qayd etti.
Sentâbrniñ 27-nde Beyaz saray spikeri Karin Jan-Pyer ABD Rusiyeniñ nükleer silâ qullanmağa azırlanğanını körmey, amma bu telükelerge ciddiy yanaşa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
