Azatlıq Radiosınıñ rus hızmeti bildire ki, dekabrniñ 26-nda Ukrayina tarafından yapılğan raketa ücüminden soñ Rusiye gemisi "Novoçerkassk"niñ parçaları Kefe merkezinde tarqalğan.
Qayd etilgenine köre, ''Vesti Krım'' telegram kanalı, büyük desant gemisi qısmen batqan ve, ihtimal ile, yoq etilgen Kefe limanındaki patlav aqibetleri aqqında haberni derc etip, soñra sildi.
Jurnalistlerniñ qayd etkenine köre, fotoresimlerden birinde, tahmin etilgenine köre, geminiñ 2 metr ve 2 metr büyükliginde bir parçası kösterile. Jurnalistler, gemige urulğan yerden 650 metr uzaqlıqta Kefedeki "Deñiz" aşhanesi yanında yapılğan bu fotoresimni belgilediler.
Ukrayina arbiy ava quvetleri, gece saat üçte taktik aviatsiya Rusiye Qara deñiz flotunıñ Novoçerkassk adlı büyük desant gemisine qanatlı raketalarnen ücüm etti, dep bildirgen edi.
Ukrayina Ava quvetleriniñ komandanı Nikolay Olesçuk, nişsn muvafaqiyetnen uruldı, dep bildirdi.
Qırımnıñ Rusiye yolbaşçısı Sergey Aksönov Kefe limanına ücüm yapılğanı, ateş açılğanı ve patlatılğanı aqqında bildirdi. Onıñ aytqanına köre, Kefe limanına ücüm neticesinde bir insan elâk oldı, daa ekisi yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
