Rusiyeniñ Novoçerkask tahqiqat tevqifhanesinde "Qırım musulmanları davası" boyunca 13 yıl apis cezasına mahküm etilgen qırımlı siyasiy mabüs Cemil Gafarov vefat etti.
Bunı "Qırım birdemligi" cemaat birleşmesine advokat Lilâ Gemeci haber etti.
"Men SİZO-ğa telefon açtım, maña onıñ vefat etkenini haber ettiler. Bugün morgğa alacaqlarını ayttılar", - dedi Gemeci.
Daa evel Gafarovnıñ advokatı Emil Kurbedinov Novoçerkask SİZO-sında müvekkiline tibbiy tedqiqler yapılmay dep bildirgen edi.
Yanvarniñ 13-nde «Qırım birdemligi» qırımlı advokatlarnıñ aq qorçalayıcı ofisiniñ malümatına esaslanıp, «qırımlı musulmanlar davası» boyunca mahküm etilgen siyasiy mabüs Cemil Gafarovnıñ sağlıq vaziyeti «birden fenalaştı», dep bildirген эди.
Mabüsniñ ömür arqadaşı Raziye Gafarovanıñ aytqanına köre, cinaiy dava açılmazdan evel, 2017 senesi, keniş miokard infarktı oldı. O yıl büyrek yetmezligi aqqında aytqanlar. Siyasiy mabüs büyreklerniñ dializine muhtac, SİZO şaraitlerinde bunı yapmaq imkânsız.
Yanvarniñ 11-nde «qırımlı musulmanlar davası» boyunca qabaatlanğan qırımtatarlar Alim Karimov, Seyran Murtaza, Erfan Osmanov, Cemil Gafarov ve Servet Gaziyev Rusiye mahkemesi tarafından 13 yılğa azatlıqtan marum etildi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri Alim Karimov, Seyran Murtaza, Erfan Osmanov, Cemil Gafarov ve Servet Gaziyevniñ evlerini tintip, olarnı tuttı. Umumen 20-den çoq insan tutuldı. 2019 senesi martnıñ 27-nde ve 28-nde Aqmescitniñ Rusiye rayon mahkemesi episini apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan qırımtatar faallerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
