Rusiyeniñ Moldovadaki vaziyetni kerginleştirmek planı aqqında haberler «teren qasevet» doğura, dep bildirdi Beyaz saraynıñ Milliy telükesizlik şurasınıñ spikeri John Kirby fevralniñ 13-nde.
Bu plan mustaqil menbalarda isbatlanmasa da, bu «Rusiyeniñ terbiyesi tışına çıqmay ve Moldova ükümeti ve Moldova halqına qoltutamız», – dedi Kirby.
Moldova prezidenti Maya Sandu Ukrayına mahsus hızmetlerinden kelgen vesiqalardan soñ «çoq diqqatlı» olmağa çağırdı. Onıñ aytqanına köre, bu haberler Rusiyeniñ Moldovanı kerginleştirmege, memleket akimiyetini deñiştirmege ve öz adamlarını qoymağa planlaştırğanını köstere.
Sandunıñ aytqanına köre, Rusiye tarafdarları olğan muhalifet küçleri narazılıq aktsiyası adı altında devlet müessiselerine ücüm etecek ve reine alacaq. Bu areketlerge «arbiy azırlığı olğan, vatandaş urbasına kiyingen diversantlar» celp etile bile, hususan – Rusiye, Beyazrusiye, Sırbistan ve Qarabağdan.
Sandu, Rusiyege Moldovadaki bazı küçler yardım ete bile, dep bildirdi, hususan çetelde olğan muhalifet siyasetçileri ve iş adamları İlan Şor ve Vlad Plahotnükniñ tarafdarları.
Sandunıñ fikirince, Rusiyeniñ maqsadları – memleketniñ Avropa integratsiyasını toqtatmaq ve Moldovanı Ukrayınağa qarşı cenkte qullanmaq. Sandu bıltır küzde olğan kütleviy narazılıq aktsiyalarını Rusiyeniñ planlarınen bağladı, olar «telükesizlik ve cemaat nizamı organlarınıñ operatik areketleri sayesinde maqsadına irişemedi», dep ayttı.
Keçken afta Moldovanıñ baş naziri Natalya Gavrilitsa istifağa çıqtı. Baş nazir vazifelerini vaqtınca Dorina Reçana eda ete – Moldova Telükesizlik şurasınıñ sabıq kâtibi. Ukrayına prezidenti Volodımır Zelenskıy Avropa birligi memleketleriniñ liderlerinen körüşip, Moldova prezidentini Rusiyeniñ memleketteki vaziyetni kerginleştirüv planlarınen tanıştırğan soñ ertesi künü baş nazir deñişti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
