Ukraina akimiyeti Rusiye ordusınıñ Mariupolde himik silâ qullanğanına dair malümatnı teşkere, dep bildirdi Ukraina mudafaa naziriniñ muavini Ğanna Malâr.
«Şimdige qadar bu malümatnı teşkeremiz, ne olğanını añlamağa tırışamız. Amma, ilk malümatqa köre, fosfor silâlı olğanını ayta bilem. Lâkin doğru resmiy malümat soñra olacaq», – dedi Malâr milliy telemarafon yayınında.
Onıñ qoşqanına köre, Rusiye ordusınıñ himik silâ qullanuv telükesi bar «ve bayağı yüksek».
Aprelniñ 11-nde aqşam Mariupolni qoruğan «Azov» alayı Rusiye arbiyleri uçucısız cihazdan Ukraina arbiylerine ve şeerdeki vatandaşlarğa ne olğanı belli olmağan zeerli madde tüşürdi. Haberlerge köre, zarar körgenlerniñ nefesi tutula, vestibulo-ava yetersizligi bar, belli olmağan madde qullanıluvınıñ aqibetleri ögrenile.
Soñra «Azov» lideri Andriy Beletskıy üç zarar körgen kişi aqqında bildirdi. Onıñ aytqanına köre, olarnıñ «himik maddenen zeerlenüv alâmetleri bar edi, amma felâketli aqibetler olmadı».
Büyük Britaniya Tış işler naziri Lis Trass memleketi ortaqlarınen beraber Mariupolde himik silâ qullanılıp-qullanmağanını teşkermek içün çalışa.
Aprelniñ 11-nde «RİA Novosti» Rusiye devlet agentligi Rusiye qoltutqan «DNR» gruppirovkasınıñ vekillerinden biri Eduard Basurinniñ aytqanlarını bildirdi. O, «Azovstalda» olğan Ukraina arbiylerine qarşı himik silâ qullanılması mümkün edi, dep ayttı.
Aprelniñ 11-nde saba Britaniya arbiy istihbaratı Mariupolde Rusiye ordusınıñ fosfor silâ qullanması mümkün, dep tahmin etti.
Aprelniñ 11-nde Ukraina prezidenti Volodımır Zelenskıy Ukraina yeterli sayıda ağır silâ alsa, Mariupolni bloktan çıqarır edi, dep haber etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
