Ukrayınada mayısnıñ 18-nde qırımtatar halqı genotsidiniñ qurbanlarını añalar.
«1944 senesi mayısnıñ 18-nde başlağan sovetler rejiminiñ cinayeti totalitar maşina yıllar devamında gizlegen eñ büyük facialardan biri oldı. 79 yıl evelsi sovetler akimiyeti milliy kimlikni ve Ukrayınanıñ tamır halqını yoq etmek içün cinayet yaptı», – dep aytıla Ukrayına Yuqarı Radasınıñ muracaatında. Onı parlament adından spiker Ruslan Stefançuk oqudı.
Metinde aytılğanına köre, 2014 senesi Rusiye Qırımnı işğal etken soñ «eski usullarğa qayttı, repressiyalar başlattı, qırımtatar halqını «saylay-saylay mahmeke etti».
«Ve maqsat kene deñişmedi – Ukrayınanıñ tamır halqını yoq etmek. Rusiyelilerniñ tarihiy bir çizgisi bu ve milliy kimlikni yoq etmek ıntıluvı. Yamanlıqnı yeñüv cinayetler tarihında noqta qoya bile», – dep aytıla muracaatta.
1944 senesi mayısnıñ 18-nde sovetler rejimi qırımtatar halqını Qırım yarımadasından Orta Asiya ve Uralğa sürgün etip başladı. Umumen 200 biñ insan sürgün etildi.
Er yıl Qırımda Qırımtatar halqınıñ genotsid qurbanlarını añma tedbirleri keçirile edi. Paytahtnıñ merkezinde matem mitingi ötkerile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalar keçirilmey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
