Kıyivde İlk küzniñ 8-ne keçer gecesi Rusiye ücümi neticesinde eki insan elâk oldı, zarar körgenlerniñ sayısı onğa arttı, dep bildire Fevqulâde vaziyetler devlet hızmeti.
Qurtarıcılar duşman ateşiniñ aqibetlerini yoq etmege devam eteler. Şimdiki vaqıtta Ğolosiyiv ve Podol rayonlarındaki mesken olmağan binalarda yanğınlarnı söndürüv devam ete. Dnipro rayonında ateş açılğanından sebep ot yataqları yandı, dep aytıla haberde.
Daa evel şeer akimiyeti ücüm neticesinde yaralanğan altı kişi aqqında bildirgen edi.
Ukrayina Silâlı quvetleriniñ ava quvetleri Rusiye ordusı Kıyivge ballistik raketalarnen ücüm etkenini bildirdi. Fevqulâde vaziyetler devlet hızmetiniñ malümatına köre, eñ az beş rayonında yanğın ve viraneler bar.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.