Kyivde dekabrniñ 20-nde saba Rusiyeniñ ücümi neticesinde, ilk malümatqa köre, Ğolosiyıvskıy rayonında bir adam elâk oldı, dep bildirdi Kyiv şeeriniñ arbiy memuriyet yolbaşçısı Serğiy Popko.
Şeer yolbaşçısı Vitaliy Kliçkonıñ aytqanına köre, Kyivniñ dört rayonında tüşken parçalar qayd etildi, eki insan yaralandı.
«Duşman ücümi neticesinde Golosiyıvskıy, Solomenskıy, Şevçenkivskıy ve Dnipro rayonlarında parçalar tüşti. Binalarnıñ damları yana, maşinalar da yana. Golosiyıvskıy rayonındaki qızdıruv magistrali de zarar kördi. Acele yardım hızmetleri çalışa», – dep yazdı Kliçko Telegramda.
Kyiv şeer arbiy memuriyetiniñ yolbaşçısı Serğiy Popko qayd etti ki, Golosiyıvskıy rayonında idare binası, yol ve gaz borusı zarar kördi, beş maşina yandı; Dnipro rayonında qurucılığı bitmegen bina zarar kördi; Solomenskıy rayonında – ilk malümatqa köre, binada yanğın oldı.
Saba saat yedige yaqın Rusiye arbiyleri Kyivge raketalar ücümini başlattı, şeerde patlavlar eşitildi.
Rusiye arbiyleri muntazam sürette çeşit silâ çeşitleri ile ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
