Kremençukta Rusiyeniñ "Amostr" ticaret merkezine raketa ücümi neticesinde eñ azı 18 adam öldi, 59 yaralandı. Bunı Poltava vilâyetiniñ arbiy memuriyetiniñ başı Dmıtro Lunin haber etti.
G7 liderleri Kremençuktaki ticaret merkezine etilgen "igrenç ücümni" takbih ettiler.
"Masüm barışıqsever adamlarğa qarşı nişan köstermegen ücümler arbiy cinayettir. Rusiye prezidenti Vladimir Putin ve mesül şahıslar mesüliyetke çekilecek. Bugün biz Rusiyeniñ tecavuzına qarşı cenkte Ukrayinağa sarsılmaz destegimizni bir daa tasdıqlaymız. Maliyeviy, gamunitar ve arbiy destek köstermege devam etecekmiz. Rusiye Ukrayinağa qarşı zalım ve manasız cenkni toqtatmağance sakinleşmeycekmiz", - dep yazıla "Büyük yedi devlet" gruppasınıñ beyanatında.
Evel Volodımır Zelenskıy Kremençukta Rusiye raketası barıp urğan ticaret-eglence merkezinde biñden çoq adam buluna bilecegini bildirdi.
Poltava vilâyetiniñ arbiy memuriyetiniñ başı Dmıtro Lunin ticaret merkezine raketa darbesiniñ endirilmesine "ruslarnıñ insanlıqqa qarşı daa bir arbiy cinayeti" dedi.
Rusiye arbiyleri kremunçuktaki ticaret merkezine ücümni daa izaatlamadılar.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
