Rusiyeniñ Krasnoyarsk vilâyetiniñ Yeniseysk şeerindeki 2-nci apishaneniñ yolbaşçısınıñ vazifelerini vaqtınca eda etken Yevgeniy Larin, qırımlı vatandaş jurnalisti Remzi Bekirovnıñ apayına, aqayı Yeniseyskniñ 2-nci apishanesinden qaysı koloniyağa etap etilgenini aytmaqnı red etti. Bu aqta "Qırım birdemligi" Halide Bekirovanıñ özü ikâye etti.
Larinniñ muracaatına cevap olaraq müessise, şahsiy malümat aqqında qanun sebebinden, etap etilgen yeri aqqında malümatnı aydınlatmaycaq, dep bildirdi.
Daa evel 19 yılğa mahküm etilgen "Qırım birdemligi"niñ faali ve vatandaş jurnalisti apishaneden iyülniñ 5-nde çıqarılacağını qadınına bildirdi. Başta Rusiyeniñ Krasnoyarsk şeerindeki tranzit noqtasına yollanıldı.
Remzi Bekirov — vatandaş jurnalisti, "Qırım birdemliginiñ" faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden "Veciye Kaşka" davası, arhiyepiskop Klimentniñ tutuluvı, "Hizb ut-Tahrir" ve diger davalar boyunca. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
