Kıyivde Rusiye ücüminiñ aqibetleri üç rayonda qayd etildi.
Şeer yolbaşçısı Vitaliy Kliçkonıñ bildirgenine köre, Solomensk rayonında infrastruktura obyekti zarar kördi ve raketa parçaları evniñ azbarına tüşti — yanğın çıqmadı, amma oquv yurtunıñ bir korpusına tüşken soñ yanğın çıqtı.
Bundan ğayrı, Kliçko Peçersk rayonında üç qatlı mesken olmağan binada yanğın çıqqanını bildirdi.
Saat 6:00 civarında sarı havf telükesi ilân etilgen soñ, Kıyiv şeeriniñ arbiy memuriyeti, Golosiyivsk rayonında 5 qatlı evniñ damında yanğın çıqqanını, Solomensk rayonında ise şahsiy evniñ territoriyasında yanğın çıqqanını bildirdi.
Yerli akimiyetniñ malümatına köre, İlk küzniñ 28-nde Kıyivde Rusiye ücümleri neticesinde eki insan elâk oldı, daa 26 yaralandı, 8-i hastahanege alındı: bir yaralanğan ağır alda buluna.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.