Avropa diplomatiyasınıñ başı Josep Borrell, aqşam Kıyivniñ Rusiye orludı tarafından ateşke tutulması anda BMT-nıñ baş kâtibi Antonio Guterres ve Bulğaristan baş naziri Kirill Petkovnıñ bulunğan zamanı onı şaşırtqanını bildirdi.
"Rusiyeniñ Kıyivge ve Ukrayinanıñ diger şeerlerine raketa ücümleri meni şaşırtmaqta. Rusiye BMT baş kâtibi Antonio Guterresniñ ve Bulğarstan baş naziri Kirill Petkovnıñ anda bulunğan zaman şeerni ateşke tutıp kene halqara uquqnıñ qaba şekilde bozulmasını köstere", - dep yazdı Börrel Twitter saifesinde.
Kyivniñ şeer yolbaşçısı Vitaliy Klıçko aprelniñ 28-nde Rusiye ordusınıñ paytahtnıñ Şevçenko rayonına ateş açqanını bildirdi.
Ukrayina prezidenti Volodımır Zelenskıy, Rusiyeniñ BMT-nıñ baş kâtibi ile körüşüv tamamlanğan soñ Kıyivni deral atekşe tutqanını bildirdi.
Onıñ sözlerine köre, Rusiye tarafından Kıyiv, Fastiv, Odesa, Hmelnits ve diger şeerlerniñ ateşke tutulması "raatlanmaq daa erte" olğanını köstere.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
