Moskva vilâyetiniñ Vlasiha şeerindeki İstinaf arbiy mahkemesi "birinci Canköy" gruppasınıñ mabüslerine qarşı sıñırlav tedbirini tasdıqladı ve "Qırım birdemliginiñ" mühbiri Vilen Temeryanov, Rinat Aliyev ve Edem Bekirovnı avgustnıñ 29-na qadar apiste qaldırdı. Bu aqta "Qırım birdemligi" haber ete.
Advokat Emil Kürbedinovnıñ qayd etkenine köre, davanıñ daa bir mabüsi Seytyaya Abbozov ev apsinde bulunacaq.
Mahkeme oturışında imaye tarafı, mahkemeniñ birinci instantsiya mahkemesi tarafından tasdıqlanğan sıñırlav tedbirini deñiştirmek kerek olğanı aqqında delillerni taqdim etti. Birinci Canköy gruppasınıñ iştirakçileri de çıqışta bulunıp, apiske alınğanından berli SİZO-da tutuluv müddetini sebepsiz uzatqanlarını qayd ettiler.
2022 senesi avgustnıñ 11-nde saba Canköy ve Canköy rayonında qırımtatar faalleriniñ evlerinde kütleviy tintüvler keçirildi, advokatlarnı tahqiqat tedbirlerine yibermediler, olar mobil bağnıñ kesilgenini bildirdiler. Vilen Temeryanov, Enver Kroş, Seityaya Abbozov, Murat Mustafayev, Edem Bekirov ve Rinat Aliyevni Rusiye quvetçileri Rusiyede yasaq etilgen "Hizb ut-Tahrirde" iştirak etkenlerinde qabaatlap yaqaladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
