Rusiyeniñ qırımtatarlar, ukrayınler ve sabıq Sovet Sotsialistik Cumhuriyetler Birliginiñ diger halqlarına qarşı genotsid siyaseti – bir seferlik bir şey degil, bir qaç asır devam etken cinayettir. Bu hulâsanı «Hatıra aqqı: qırımtatar halqı genotsidiniñ qurbanlarını añmanıñ 80 yılı» ekspert diñlevleri vaqtında çıqardı.
Olar Rusiyeniñ genotsid siyaseti 30-ıncı yıllarnıñ Ğolodomorı ve 1944 senesi qırımtatar halqı sürgünliginen sıñırlanmay, dep qayd ete.
Onıñ şekillenmesi XVII asırda ukrayınler ve qırımtatarlarğa qarşı istilâ, ukrayınlerge ve sürgünlikke oğrağan Kavkaz halqları, repressiyalar ve milliy ziyalılarnıñ qurşunğa tizilüvi, tillerniñ yasaqlanması, total ruslaştıruv, bu halqlarnıñ medeniy mirasını yoq etüv, balalarğa mefküreviy tesir, tarihnıñ sahteleştirilüvi vaqtında başlandı, dep qayd etile.
Ekspertlerniñ fikirince, Rusiye bugün de genotsid siyasetini devam ettire – ukrayınalı balalarnı sürgün ete, qırımtatar ve ukrayın faallerini, din kütken musulmanlar ve Ukrayına Ortodoks kilsesiniñ vekilleri, İyegova Şaatlarını taqip ete, kilse, milliy medeniyet obyektlerini yoq ete, ukrayın, qırımtatar ve diger milletlerniñ maneviy qıymet obyektlerini yoq ete.
Tedbir iştirakçileri Qırımtatar resurs merkezi yapqan sürgünlik şaatları ve diger genotsid şaatlarınen filmlerni baqtı, «Qırımnıñ kelecegi: uquqiy teminlev ve işğalden qurtaruv ve Qırım reintegratsiyasınıñ strategiya tevsiyeleri» ekspert hulâsasını taqdim etti.
Ekspertlerniñ diñlevlerinde iştirak etkenler: Qırımtatar resurs merkeziniñ idare reisi Eskender Bariyev, «Oleksandr Yaremenko içtimaiy-uquqiy ve siyasiy tedqiqatlar institutınıñ» ilmiy-tedqiqiy merkeziniñ müdiri Konstantin Zaharenko, Ukrayına halq deputatı Volodımır Aryev, Qırımtatar Milliy Meclisiniñ azası Riza Şevkiyev, Qırım Muhtar Cumhuriyetindeki televideniye ve radio meseleleri milliy şurasınıñ reisi Volodımır Lâşenko, Qırımtatar resurs merkeziniñ bağlar idarecisi Tatyana Savçuk, uquqçı Lüdmila Korotkih ve digerleri.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
