Yanvarniñ 2-ne keçer gecesi Rusiye Federatsiyasınıñ Brânsk, Orel, Kursk, Primorsko-Ahtarsk yönelişlerinden 72 darbe Shahed uçucısızı ve diger dronlarnen Ukrayinağa ücüm etti, dep haber ete Ukrayina Ava quvetleri.
«Saat 8.30-ğa qadar Poltava, Sumı, Harkiv, Kyiv, Çerniğiv, Çerkası, Kirovoğrad, Dnipropetrovsk, Odesa, Herson vilâyetlerinde Shahed tipli 47 ücüm uçucısızı ve diger dronlarnıñ urıp tüşürilgeni tasdıqlandı», – dep aytıla haberde.
Ukrayina Mudafaa küçleriniñ faal qarşılığı sebebinden 24 Rusiye taqlit dronı ğayıp oldı (menfiy neticeler olmadan), dep qayd etti Ukrayina arbiyleri.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Yañı yıl hayırlavında Ukrayina prezidenti Volodımır Zelenskıy qayd etti ki, 2024 senesi ava mudafaa küçleri 1310 qanatlı ve ballistik raketanı ve 7800-den ziyade İran Shahedini urıp tüşürdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
