İyülniñ 8-nde Rusiyeniñ Donetsk vilâyetinde Limannı ateşke tutması neticesinde eñ az sekiz kişi öldi, on üç yaralandı, dep haber ettliler Ukrayina İç işler nazirliginde.
"Saaba saat onlarda Rusiye ordusı şeerge toplu ateş reaktiv sistemasından darbe endirdirip, hususiy sektroğa urdı. Ev ve tükân zarar kördi", - dep yazdı Donetsk vilâyetiniñ arbiy memuriyetiniñ yolbaşçısı Pavlo Kırılenko.
Onıñ sözlerine köre, qaza yerinde polis çalışa, ekimler kerekli tibbiy yardım köstereler.
Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
