Litvaniyanıñ sabıq parlament başı, avropalı siyasetçi Vitautas Landsbergis emin ki, Rusiyeniñ dağılması Ukrainanıñ ilhaq etilgen Qırım üzerinde nezaretini qaytarmaq içün yekâne fırsattır. Bunı o "Den" neşrine bildirdi.
«Menimce, Ukraina akimiyetiniñ ilân etkeni kibi degil, Qırımnı keri alacaqmız ve belki de tezden. Amma bu "tezden" ya da "tezden degil" yalıñız Rusiye dağılğan soñ olur, evel olmaz. Rusiye, bütün özek silâlarınıñ bar oluvı zaman, cenk faktını ve hatasını tanıp Qırımnı qaytaracağı olmaz», – dedi o.
Onıñ fikrince, "Rusiye bütün Avropanıñ toprağına saip olmaq" arzusına irişmegence "toqtamaz".
«Rusiye dağılacaq, çünki bütün imperiyalarnıñ soñu bar. Rusiye artıq eki kere dağıldı ve üçünci kere de dağılır. Hususan, imperiya qanlı, zorba olğanda, halqlarnıñ onı sevmegende ve istemegende. Şunıñ içün bu zaman meselesidir», – dedi siyasetçi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
