Ukrayına energetika naziri German Galuşçenko bildirgenine köre, Rusiyeniñ Ukrayına energetika infrastrukturasına qarşı endirgen kütleviy darbeleri sebebinden «em memleketniñ şarqında, em cenübinde» energetik obyektler zarar kördi.
«Generatsiya miqdarı eksile bile. Elektrikler söndürile», – dep yazdı o, Facebookta.
Ukrayına naziriniñ aytqanına köre, ilk fırsatta energetika hadimleri elektrikni yañıdan temin etecekler.
Saba saat sekizlerde bütün Ukrayınada avadan telüke bar, dep ilân etildi. Yerli akimiyet vekilleri Rusiye Ukrayınağa qarşı onlarnen raketa uçurdı, dep bildirdi. Telegram kanallarında Kyiv, Harkiv, Mıkolayıv, Zaporijjâ, Dnipropetrovsk, Ternopil vilâyetlerinde patlav sesleri aqqında aytıla.
Kyiv şeer yolbaşçısı Vitaliy Klıçko Kyivniñ üç rayonında patlavlar aqqında bildirdi. Krıvıy Riğ şeerinde mesken evge tüşken raketa bar, bir çoq şeerde elektrik söndürildi.
Rusiye uçucısız ve raketalarnı qullanıp, Ukrayına energetika sistemasına kütleviy darbe endire. Rusiye Ukrayına energetik sistemasınıñ büyük qısmına zarar ketirdi, Ukrayınada em planlaştırılğan, em acele elektrik kesüvleri ola.
Ukrayına akimiyeti, böyle ücümler bitse de, 2023 senesi baarinden evel elektrik kesüvlerinden vazgeçmege imkân olmaycaq, dep tahmin ete. Eñ büyük kütleviy darbeler vaqtında Rusiye tahminen 100 raketa qullandı, çoqusını Ukrayına ava mudafaa sisteması tüşürdi, amma bir qısmı maqsadına irişti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
