Minusinsk şeer mahkemesi Rusiyeniñ Cezalarnı yerine ketirüv federal hızmetiniñ müessiselerinden biriniñ 17 yılğa üküm etilgen «qırımlı musulmanlar davasınıñ» soqur mabüsi Aleksandr Sizikovnıñ azat etilmesinen bağlı ricasını baqacaq.
Bu aqta anası Yelena Sizikova ve mahkemede menfaatlarını temsil etken advokat «Qırım birdemligine» bildirdi.
Qayd etilgenine köre, davacı qırımlı tutulğan Minusinsk apishanesi oladır.
Malümat tek yaqında mahkemege keldi. Birinci oturışuvnıñ künü soñra belli olacaq.
Yelena Sizikovanıñ aytqanına köre, №1 Krasnoyarsk verem hastanesinde yapılğan teşkerüvden 15 künden soñ oğlunı apishanege qaytarğanlar. Martnıñ 27-nden başlap o, Minusinskte bulundı.
Qırımlı bütünley teşkerüvden keçti, ekimler onıñ soqur olğanını (2009 senesinde olğan yol qazasından soñ oña I derece saqatlığı berildi) tasdıqladı. Onıñ 3 basamaq gipertoniyası da qayd etildi.
Advokatnıñ malümatına köre, hastahane Sizikovnı azat etmege tevsiye etti, çünki esas hastalıq – körlik – apiste tutuluvğa mania olğan hastalıqlar cedveline kire.
2020 senesi oraq ayınıñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi quralayda Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
