Rusiye Belbek arbiy ucaq alanında raketa ücüminden soñ yanğın çıqtı, dep bildire ASTRA telegram-kanalı öz eki menbasına esaslanıp.
Bundan da ğayrı, "Krımskiy veter" teleqramı, sanki, ava limanınıñ yaqıt anbarına bir şey urulğanını iddia ete. Rusiye akimiyeti ücüm toqtatıldı, dep bildire. Şimdilik bu malümatnı başqa menbalarnen tasdıqlap olamaylar.
Belbek uçaq alanına bir gece evelsi ücüm etildi. Qırım.Aqiqat tarafından ögrenilgen uydu resimleri mayısnıñ 15-nde yanğın çıqqanını tasdıqlay.
Qırım.Aqiqatnıñ malümatına köre, uçaq alanında RF Arbiy ava quvetleriniñ 38-inci qırıcı aviatsiya polku, Rusiye Fevqulâde vaziyetler nazirliginiñ Sevastopol aviatsiya-qurtaruv merkezi yerleşe, 12 Su-27 uçağı, 12 Su-27SM uçağı, üç Su-27UB oquv-arbiy uçağı ve 5 eki kişilik Su-30M2 bar.
Mayısnıñ 15-nde aqşam yerli ve Rusiye telegram kanalları Belbek Rusiye arbiy uçaq alanu civarında patlavlar aqqında haber etti, Aqyarda ise ava telükesi ilân etildi. Bundan ğayrı, bir sıra Qırım telegram kanalları yerli sakinlerge esaslanıp, Aqmescit, Kezlev, Canköy ve Rusiye arbiy ava limanları yerleşken Sarabuz şeerlerinde patlav sesleri eşitile, dep bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
