Rusiye akimiyeti Amsterdamdaki Allard Pirson müzeyinden "Skit altını"nıñ ukrayin tarafına berilmesi ile bağlı Felemenk ve Ukrayinağa qarşı Avropa insan aqları mazkemesine şikâyet berdi. Uquq qoruyıcı Nikolay Polozov Rusiye tarafınıñ AİAM-ne bergen şikâyetni istiqbalsiz saya. O, bu mesele ile bağlı delillerini Qırım.Aqiqatqa añlattı.
"AİAM-niñ Büyük Palatası Ukrayinanıñ Rusiyege qarşı iddiası ile bağlı artıq emsal qararlar bergenini ve Qırımnıñ işğaliniñ ğayrı-qanuniy pozitsiyasını açıq şekilde ifade etkenini köz ögüne alaraq, men bu şikâyetni tamamınen istiqbalsiz sayam. Aksine, mında saiplerinden aman-aman hırsızlanğan mallarnı mahkeme yolu ile özüne almağa tırışqan hırsızlarnıñ vicdansızlığını körmek mümkün", - dep izaatladı vaziyetni advokat.
Rusiyeniñ nezareti astında olğan "Şarqiy Qırım tarih ve medeniyet müzey qoruğınıñ" baş müdiri Tatyana Umrihina Rusiye tarafı "Skit altını"nıñ Ukrayinağa berilmesi ile asla razı olmağanını bildirdi.
İyünniñ 9-nda Felemenk Yuqarı mahkemesi "Skit altını" Ukrayiağa qaytarılmaq kerek, dep qarar çıqardı.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukrayina akimiyeti artefaktlar müzeylerniñ mülki degil, Ukryaina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
