Rusiyeniñ Arhangesk vilâyetiniñ Nenetsk muhtar bölgesinde Naryan-Marsk şeer mahkemesi Krsnoye qasabasınıñ sakini Konstantin Ledkovnı 35 biñ rublelik cöreme ödetti.
O, "Qırım ile bağlı aytqanı içün Rusiyeniñ topraq bütünligini bozmağa" açıq çağıruvlar yapqanınen qabaatlı tanıldı, dep haber ete "OVD-İnfo".
Ledkov "VKontakte" içtimaiy ağında eki yazı yaptı. Olardan birinde Qırım ile resim bar edi ve yarımada Ukraina qısmı olğanı aqqında yazılğan edi. Ekincisinde sögünç sözler ve "işğal etilgen Qırımğa kelmek" dep yazılğan edi. Bunı Şimal.Aqiqat haber ete.
Ledkovnıñ evine polis hadimi ve prokuror keldi, onı ekstremiz ile qbaatladılar. Odasını baqmaq içün izin alıp, oda, kompyüter ve kitaplarnıñ fotoresimlerini çektiler. Laf etkende, Ledkov Rusiye FBS-sini meraqlandırğanını ayttılar.
Oña qarşı memuriy dava açtılar. Mahkemede erkek qaç para cöreme ödep olur, dep soradılar ve 35 biñ rublelik para cezasını berdiler.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
