Link açıqlığı

Saatnıñ esas haberi

Ukrainadaki saylavlar Rusiyeniñ yalan haberleri ve tesirine baqmadan keçirildi – Avropa parlamentiniñ közeticileri


Ukraina prezidenti saylavları. 2019 senesi martnıñ 31-i
Ukraina prezidenti saylavları. 2019 senesi martnıñ 31-i

Bazı menfiy faktorlarğa, hususan Rusiye tarafından yapılğan tesir ve yalan haberlerniñ tarqatılmasına baqmadan, Ukrainada saylavlar keçirildi, dep bildirdi Avropa parlamentiniñ Ukrainadaki saylavlarnı nezaret etken halqara missiyanıñ közeticiler vekili Dariuş Rosati.

Onıñ qayd etkenine köre, közeticiler Ukraina prezidenti namzetleri arasında kerçek bir reqabet kördi, dep bildire Azatlıq Radiosı.

Rosati bozuvlarğa da diqqat celp etti.

«Elbette, memuriy resurs qullanğan bazı şeyler bar, bazı nazmetler kampaniyasını aydınlatmaq içün kütleviy haber vastalarını qullandı», – dep qayd ete Rosati.

O, bunı aprelniñ 1-nde Kyivde OSCE Demokratik institutlar ve insan aqları bürosı, OSCE Parlament assambleyası, Avropa Şurasınıñ Parlament assambleyası, NATO Parlament assambleyası ve Avropa parlamenti erkânındaki Ukraina saylavlarını közetken halqara nezaretçilerniñ matbuat konferentsiyasında ayttı.

Ukraina Merkeziy saylav komissiyasınıñ bildirgenine köre, Ukraina prezidenti saylavlarında protokollarnıñ 80%-ı teşkerilgen soñ oyuncı Volodımır Zelenskıy lider olıp qala. Saylayıcılarnıñ 30,35%-ı (4 mln 742 biñ) rey berdi. Soñra şimdiki prezident Petro Poroşenko kete (16,03%).

Ukrainada martnıñ 31-nde prezident saylavları olıp keçti. Saylayıcılarnıñ 63,5%-ı rey berdi.

Milliy exit poll malümatına köre, Volodımır Zelenskıy 30,6%, Petro Poroşenko – 17,8%, Yuliya Tımoşenko – 14,2%, Yuriy Boyko – 9,7%, Anatoliy Grıtsenko – 7,1%, Aleksandr Şevçenko – 0,5% qazandı.

Merkeziy saylav komissiyası saylavlarnıñ soñki neticelerini aprelniñ 10-na qadar ilân etmeli. Ekinci tur aprelniñ 21-nde olacaq.

XS
SM
MD
LG