Rusiye Federatsiyasınıñ ordusı keçken künü tahminen 610 arbiyini ğayıp etti, dep bildirdi Ukrayina Silâlı quvetleriniñ Baş ştabı.
Berilgen malümatqa köre, Rusiyeniñ Ukrayinağa qarşı kerçekleştirgen büyük istilâsı başlağanından172 340 biñ Rusiye arbiyi öldi.
Bundan ğayrı, Ukrayina Silâlı quvetleri Baş ştabınıñ malümatına köre, fevralniñ 24-nden Rusiyeniñ ğayıpları böyle oldı:
- 3 609 tank (+7)
- 6 966 zırhlı araba
- 2 659 top sistemaları (+6)
- 526 toplu ateş reaktiv sistemaları (+1)
- 277 ava mudafaa vastaları
- 306 uçaq (+1)
- 291 vertölet
- 2 239 operativ-taktik seviyeli uçucısız (+4)
- 911 qanatlı raketa
- 18 gemi ve kater
- 5 507 maşina ve avtotsisterna (+5)
- 288 mahsus tehnika (+1)
Fevralniñ 2-nde The New York Times neşiri Amerika ve diger ğarbiy memurlarınıñ malümatına esaslanıp, Ukrayinada öldürilgen ve yaralanğan Rusiye arbiyleriniñ sayısı 200 biñge yaqınlaşa, dep bildirdi.
Ğarp memurları Rusiye Bahmut ve Soledardaki uruşlarda arbiylerini çoq coydı, dep qayd ete.
Noyabr ayında ABD ştablarınıñ birleşken yolbaşçılar komitetiniñ reisi general Mark Milli cenkte eñ az 100 biñ Rusiye arbiyi öldi ve yaralandı, dep bildirgen edi.
Rusiye bu malümatnı aydınlatmay. Rusiye Mudafaa nazirligi soñki sefer 2022 senesi sentâbrniñ 21-nde malümat berip, 5937 kişi öldi, dep haber etken edi.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
