Rusiyeniñ aprelniñ 17-nde Hersonğa qarşı ücümi neticesinde bir kişi elâk oldı, dört insan yaralandı, 15 yaşında genç ağır alda buluna, dep haber ete vilâyetniñ arbiy memuriyeti.
Herson vilâyetiniñ arbiy memuriyet yolbaşçısı Oleksandr Prokudin qayd etkenine köre, Rusiye aviatsiyasınıñ Hersonnıñ Merkeziy rayonına endirgen darbeleri sebebinden bir adam elâk oldı, şahsiyeti ögrenile.
«Bala ağır yaralar aldı: patlayıcı ve açıq qafa-miy yara. Ekimler balanıñ ayatını qurtarmaq içün küreşe», – dep aytıla Herson vilâyetiniñ arbiy memuriyet haberinde.
Bundan ğayrı, akimiyetniñ malümatına köre, hastahanege bugün saat 10:30-da ücümge oğrağan eki Herson sakini muracaat etti.
«27 ve 58 yaşında er adamlarında patlayıcı yaralar bar. Zarar körgenler kerekli tibbiy yardım ala», – dep bildirdi memuriyet.
Daa bir adamnıñ patlayıcı yarası ve köküsniñ patlayıcı yarası bar. Onıñ alı – yengil, o, evde tedaviylenecek, dep qayd etti vilâyetniñ arbiy memuriyeti.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
