Belçikanıñ qırımtatar diasporası martnıñ 16-nda Rusiyeniñ Belçika elçihanesi ögünde yarımadada qırımtatarlarnıñ taqip etilüvini toqtatmaq talabınen barışıq narazılıq aktsiyasını teşkil etti, dep bildirdi tedbir teşkilâtçılarından biri – qırımtatar faali Riza Asanov Qırım.Aqiqatqa.
Onıñ malümatına köre, koronavirus pandemiyası sebebinden olğan yasaqlarğa baqmadan, Belçika akimiyeti teşebbüske añlayışlı yanaşıp, keçirilmesine izin berdi.
«Bu barışıq numayış 2014 senesi martnıñ 16-nda Qırımda Rusiye Federatsiyası tarafından keçirilgen «referendumnıñ» (Ukraina ve Ğarp memleketleri tanımağan – QA) 7-nci yılına bağışlana. Barışıq aktsiyanıñ maqsadı – Rusiye ükümetini qırımtatar siyasiy mabüslerini azat etmesine, ğayıp olğan qırımtatar faallerini tapmasına ve azat etmesine, qırımtatarlarnıñ taqip etilüvini toqtatmasına çağırmaqtır. Aktsiyanıñ daa bir maqsadı halqara teşkilâtlarnıñ ve kütleviy haber vastalarınıñ diqqatını Rusiye akimiyetiniñ qırımtatarlarğa qarşı artqan basqısına celp etmek oldı», – dep bildirdi faal.
Riza Asanovnıñ qayd etkenine köre, kütleviy haber vastalarına aktsiya aqqında evelden haber etildi, aktsiya matbuatnıñ diqqatını celp etti. Elçihane vekilleri bu aktsiyağa cevap bermedi.
Poloniya Tış işler nazirligi de Rusiyeni qırımtatarlarnıñ taqip etilüvini toqtatmasına çağırğan edi. Temsilcilik, «Rusiyeniñ Qırım ve Aqyar şeeriniñ qanunsız ilhaqı Avropanıñ stabilleşüvi ve telükesizligi içün ciddiy telüke ola», dep qoştı.
«Qırım referendumınıñ» yedinci yılında ABD ve bir sıra ğarbiy memleket Rusiyeniñ Qırımda yapqanlarını takbih etip, işğalni toqtatmasına çağırdı. Ukraina Tış işler nazirligi, Ukraina Qırımnı qaytarmaqta ve Rusiyeni yarımada işğali sebebinden mesüliyetke çekmekte qararlıdır, dep bildirdi.
Kreml, 2014 senesi Qırımda «referendum» «qanunğa uyğun» şekilde keçirildi, dep bildirdi, Rusiye Tış işler naziri Sergey Lavrov ise Qırım ve Aqyar «daima Rusiyenen» qalacaq, dep ayttı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
