Kim olğanı belli olmağan insanlar martnıñ 22-ne keçer gecesi Atinada Rusiye konsullığına granata attı. O, patladı, yaralanğanlar yoq. Davanı Yunanistan politsiyasınıñ terrorizm ile küreş hızmeti baqmaqta. Bu aqta «Naftemporiki» yunan gazetası haber ete.
Neşirniñ malümatına köre, patlav martnıñ 22-nde yerli saatqa köre saat 4:00-lerde oldı. Kim olğanı belli olmağan eki kişi elçihane binası yanındaki bekçi qulübesine granata atıp qaçtı. Daa soñra politsiya Atinada yaqılğan mototsiklni taptı. Tahqiqat bu mototsikl cinayetçilerge ait ola bile, dep tahmin ete, dep bildire Azatlıq Radiosınıñ rus hızmeti.
Rusiye elçihanesiniñ matbuat attaşesi Vasiliy Gavrilov TASS Rusiye haber agentligine granata politsiya qulübesine atıldı, dep bildirdi. «Naftemporiki» qayd etkenine köre, Rusiye konsullığını şahsiy şirket qaravullay.
Neşirniñ menbaları konsullıqqa yapılğan ücüm 2016 senesi olğan adisege oşay, dep tüşüne. O vaqıt kimligi belli olmağan insanlar patlayıcı cihaznı Frenkistannıñ Atina elçihanesine atqan edi. Bir politsiya hadimi yaralanğan edi, dava ise açılmadı.
