Ukraina prezidenti Volodımır Zelenskıy Rusiyenen ve doğrudan prezidenti Vladimir Putinnen dialog olmaq kerek, dep qayd etti. Bu aqta o, Politico Europe neşirine bergen intervyüsında ayttı, onıñ metnini Ukraina prezidentiniñ ofisi oktâbrniñ 6-nda öz saytında derc etti, dep haber ete Azatlıq Radiosı.
Qayd etilgenine köre, devlet yolbaşçısı ile subet oktâbrniñ 3-nde oldı. «Eminim, Rusiyenen laf etmesek, cenkni bir vaqıt toqtatıp olamaycaqmız. Ayrı bir şey – ğarbiy ortaqlarımıznıñ destegidir. Amma prezident Putinnen laf etmesek, Ukrainanı tolusınen ğayrıdan tiklep, topraqlarımıznı qaytarıp olamaycaqmız… Biz bir vaqıt teslim olmaymız ve cenkni toqatuv meselesinde ilerileycekmiz ve ortaqlarımıznen laf etecekmiz, insan ve topraqlarımıznı keri almaq içün Rusiyenen de laf etecekmiz», – dedi Zelenskıy.
Onıñ aytqanına köre, «prezident Putinnen dialog olmasa edi, tutulğan şahıslar deñiştirmez edi».
«Bu tek «normand formatında» çalışmay, yeterli degil. «Normand formatında» baqılmağan meselelerimiz bar. Deñizcilerimizniñ qaytuv meselesi, esirlikte bulunğan qırımlılarnıñ gumanitar meseleleri, bir çoqu apiste yata. Bu meseleler Rusiye prezidentinen al etilmeli», – dedi Zelenskıy.
Sentâbrniñ soñunda Ukraina prezidenti Volodımır Zelenskıy ğarbiy kütleviy haber vastalarından birine intervyü berip, Rusiye prezidentinen bağları sıñırlı, amma mevzusı belli, dep aytqan edi.
Ukraina ve Rusiye munasebetleri 2014 senesiniñ başında, Kremlniñ Qırımnı işğal etmek qararından ve Donbasta cenk areketleri başlağan soñ bozuldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
