Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov Rusiye Federatsiyası ile esirlerni deñişüv vaqtında Ukrayina azat etilmesini birinciden talap etecek şahıslarnı ayttı. Olarnıñ arasında Ukrayina Mudafaa nazirligi Baş istihbarat idaresiniñ yolbaşçısı Rusiye apishanelerinde tutulğan qırımtatarlarnı da ayttı.
Ukrayina Mudafaa nazirligi Baş istihbarat idaresiniñ matbuat hızmeti yazğanına köre, cenk esirlerine yanaşuv meseleleri koordinatsion ştabınıñ brifingi vaqtında Budanov Ukrayina ilk-evelâ ağır hasta ve ağır yaralanğanlar, qadınlarnıñ qaytmasını talap etecek, dep ayttı.
«Vatandaş esirleriniñ qaytması içün de ğayret kösterecekmiz. Hususan 2014 senesinden berli apiste olğanlar. Mariupol imayecileri, hususan «Azovstalni» imaye etkenlerge ayrı diqqat. Qırımtatarlarnı da unutmaycaqmız», – dedi Budanov.
Financial Times neşiri bildirgenine köre, Rusiye ve Ukrayina Kursk vilâyetinde zapt etilgen esirlerni deñişüv muzakerelerini başlattı.
Ukrayina Qırım Muhtar Cumhuriyetiniñ temsilciligi bildirgenine köre, Rusiye 208 qırımlı siyasiy mabüsni apiste tuta, 125-i – qırımtatarıdır.
Ukrayina telükesizlik hızmetindeki informatsion menbanıñ Azatlıq Radiosına bildirgenine köre, Ukrayina telükesizlik hızmetiniñ «A» mahsus operatsiyalar merkeziniñ mahsus hadimleri Kursk vilâyetinde Rusiye silâlı quvetleriniñ 488-inci gvardiya mototüfek polku ve «Ahmat» bölüginiñ 102 arbiyini esir aldı. Berilgen malümatqa köre, bu avgustnıñ 14-nde oldı ve bir kereden o qadar Rusiye arbiyi esir alınğan eñ büyük adise oldı.
Bundan evel Ukrayina silâlı quvetleriniñ baş komandanı Oleksandr Sırskıy Kursk vilâyetinden yüzden ziyade Rusiye arbiyi teslim oldı, dep bildirgen edi. Prezident Volodımır Zelenskıy avgustnıñ 13-nde video muracaatında Kursk vilâyetinde Rusiye ordusınıñ yüzlernen arbiyi teslim oldı, dep tarif etti. Moskva bu aqta bildirmey. Esirlerniñ tam sayısı belli degil.
Ukrayina Yuqarı Radasınıñ insan aqları vekâletlisi Dmıtro Lubinets avgustnıñ 14-nde Rusiye insan aqları vekâletlisi Tatyana Moskalkovanen avgustnıñ 6-ndan berli Kursk vilâyetinde Ukrayina silâlı quvetleriniñ devam etken ilerilevi vaqtında esirlerni deñişüv meselesini muzakere etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
