Türkiyeniñ Antalya şeerinde Ukraina ve Rusiye Tış işler nazirleri Dmıtro Kuleba ve Sergey Lavrovnıñ körüşüvi olıp keçti.
Bu, eki afta evelsi Rusiyeniñ Ukrainağa ücüm etkeninden berli başlağan eki memleket vekilleri arasında yüksek seviyeli ilk körüşüv oldı.
«İnterfaks» Rusiye agentliginiñ malümatına köre, muzakereler bir buçuq saattan çoq devam etti. O, jurnalistsiz başladı, salonğa bir qaç operator ve fotoressam kirsetildi.
Muzakerelerden soñ keçirilgen matbuat konferentsiyasında Dmıtro Kuleba taraflar ateş toqtatıluvı aqqında añlaşıp olamadı, dep bildirdi.
«Bugün Rusiyeniñ ateş toqtatıluvını Putinniñ Ukrainağa nisbeten talaplarınıñ yerine ketirilüvinen bağlağanını eşittim. Ukraina teslim olmadı ve olmaycaq. Biz diplomatik qararlarğa azırmız, amma şimdilik olar yoq, toprağımıznı Rusiye tecavuzından fedakârca qoruycaqmız», – dedi Kuleba.
Kuleba ve Lavrovnıñ muzakerelerinde Türkiye Tış işler naziri Mevlüt Çavuşoğlu bar edi. Onıñ aytqanına köre, körüşüvniñ maqsadı – Ukraina ve Rusiye prezidentleri arasında muzakerelerge adım atmaqtır.
Ankara martnıñ 7-nde Ukraina, Rusiye ve Türkiye tış işler nazirleriniñ Antalyada üç taraflı körüşüvini ilân etti. Bu fevralniñ 24-nden Rusiye Ukrainağa ücüm etkeninden berli yüksek seviyeli diplomatlar arasında ilk muzakere olacaq.
NATO azası olğan Türkiyeniñ em Kyivnen, em Rusiyenen sıqı munasebetleri bar, Türkiye Putin fevralniñ 24-nde Ukrainağa ücüm etkenini ilân etken soñ, cenk areketlerini toqtatmağa çağıra.
Ukraina prezidenti ofisiniñ yolbaşçı muavini Mıhaylo Podolâk Kyiv «mesüliyetli bir halqara aracı» istey, çünki Ukraina tarafı «Rusiye Federatsiyasına iç işanmay», dep bildirdi.
Ukraina prezidenti Volodımır Zelenskıy martnıñ 3-nde Türkiye prezidenti Recep Tayyip Erdoğan Rusiye prezidenti Vladimir Putinni Ukrainadaki cenkni toqtatmağa iqna ete bilecek pek az dünya liderlerinden biri ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
