Rusiye akimiyeti «tarihiy adaletniñ tiklenmesi» dep adlandırğan Qırım ilhaqını faydalı dep sayğan rusiyelilerniñ sayısı 2015 senesi baarinden berli 67 fayızdan 39-ğa eksildi, dep bildire Azatlıq Radiosınıñ rus bürosı.
«Obşçestvennoye mneniye» fondunıñ sorav malümatına köre, fayda ve zarar teñ kele dep tüşüngenlerniñ sayısı dört yıl içinde 15-ten 39 fayızğa arttı. «Qoşuluv» zarar ketirgeninden emin olğanlarnıñ sayısı 5 fayızdan 7-ge arttı. 14 fayızı ise Qırım ilhaqı memleketniñ iqtisadiyatına menfiy tesir etti, 46%-ı ise Rusiyeniñ halqara vaziyetine yaramay tesir etti, dep tüşüne.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
