Rusiyelilerniñ 20%-ı, imkânları olsa, memleketten çıqıp ketmege azır. Böyle malümatnı Gallup amerikan içtimaiyat sorav hızmeti derc etti. Bildirilgenine köre, bu soñki 10 yıl içinde eñ yüksek köstergiçler.
Ketmek istegenlerniñ 40%-ı Avropa Birliginiñ memleketlerinden birisine köçer edi, 16%-ı ise Şimaliy Amerikağa. Memleketlerni belgilecek olsaq, potentsial icretçilerniñ 15%-ı Almaniyanı sayladı, 12%-ı - AQŞ-nı ve 5-er fayız - Yaponiya, Kanada ve İspaniyanı.
Keteceklerniñ çoqusı Moskovada yaşay ve olarnıñ çoqusı - gençler.
Gallup aytqanına köre, ketmege istegenler niyetini kerçekleştirse, bu Rusiye iqtisadiyarına menfiy tesir eter, çünki olarnıñ çoqusı - ilimli, tasil alğan rusiyelilerdir.
Gallup içtimaiyatçıları şuna diqqat ete ki, rusiyelilerniñ icret etmek istegi prezident Vladimir Putinniñ areketlerine bağlı. 2014 senesi Qırım ilhaqı ve Soçi Olimpiadasında soñ, Putinniñ reytingi 83%-ğace yükseldi, icret etmek istegenlerniñ sayısı ise 7 %-ğace eksildi. Amma soñki yılları prezidentke qol tutqanlarnıñ sayısı 63%-ğace tüşti, keteceklerniñ sayısı ise çoqlaştı.
