Rusiyelilerniñ tahminen 80 fayızı emindir ki, Rusiye ile Ğarpnıñ tarafdaşlıq ve dostluq bağları olmalı. Azatlıq Radiosı haber etkeni kibi, bunı "Levada-Tsentr" merkezinde keçirilgen soravnıñ neticeleri köstere.
Raqip olaraq Ğarpnı respondentlerniñ 16 fayızı köre, diger 3 fayızı onı duşman saya, qayd etile içtimaiyatçılarnıñ araştırmasında.
Aynı zamanda, rusiyeliler AB ülkelerine AQŞ-dan daa yahşı münasebet duya. AB-ne yahşı ya da pek yahşı münasebet bildirgen respondentlerniñ 49 fayızı oldı, AQŞ-na ise - 42 fayız. AB-ne menfiy münasebet respondentlerniñ 37 fayızında, AQŞ-da 46 fayızında bar.
Rusiyelilerniñ ekseriyeti (52 fayız) saya ki, NATO-nıñ qısmı olğan Ğarp ülkelerinden qorqmaq içün sebep bar. Aynı zamanda, respondentlerniñ üçte birinden çoqu, bu Rusiye Ğarp içün telükedir, dep tüşüne.
Daa evel sentâbrde içtimaiyatçılar qayd etti ki, AQŞ ve Avropa Birligi ile yahşı alâqalı olğan rusiyelilerniñ sayısı 2019-cı yılnıñ mayıs ayına köre bayağı artqan.
