İşğal etilgen Qırımda esir tutulğanlarnıñ sayısı 200-den az degil. Olarnıñ arasında çetel vatandaşları da bar, rusiyeliler olarnı Herson ve Zaporijjâ vilâyetlerinden çıqarğan edi, dep haber etti «Qırım aq qorçalayıcı gruppasınıñ» idare yolbaşçısı Olğa Skripnik Cemaat radiosınıñ yayınında.
«Teşkilâtımız bir qaç on adiseni tasdıqlap qayd etti… İnsanlarnı esasen Ukrayınağa qoltutqanları içün taqip eteler. «Hizb ut-Tahrir» teşkilâtında iştirak etkeninde qabaatlanğan qırımtatarlar da taqip etilmege devam ete. İyegova şaatları da taqip etile», – dedi faal.
Tutulğan Ukrayına vatandaşlarına Rusiye akimiyeti devlet advokatlarını bile bermey, dep qoştı o.
«Yani bu insanlarnı ketireler, FSBde işkencege oğratalar ve bitti. Hususan «cinaiy davası» açılmağanlar aqqında laf kete – olar reine ola, ve advokatlarnıñ insannı ziyaret etmege resmiy bir sebebi de yoq», – dep tarif etti Skripnik.
Aq qorçalayıcı aytqanına köre, insanğa qarşı cinaiy dava açılsa, añlaşqan advokatı bar: «bir şekilde imaye etmege, bu insanlarğa qoltutmağa tırışqan mustaqil advokatlar».
Lâkin Rusiye uquq qoruyıcıları advokatlarnı kirsetmemek içün kene de bir sebep qıdıra, dep qayd ete Skripnik.
ZMINA insan aqları merkezi Qırımdaki menbalarına esaslanıp, rusiyeliler işğal etilgen topraqlardan işğal altındaki Qırımğa qanunsız çıqarğan ukrayınalılar Aqmescit SİZOsında ayrı binalarda tutula, dep bildire. Olar işkencege oğratıla, advokatlar kirsetilmey.
Hatırlatamız, Rusiye Federatsiyası işğal etken Ukrayına topraqlarından hırsızlanğan ukrayınalılarğa qarşı işkence aqqında qırımtatar faali ve siyasetçi Nariman Celâl tarif etken edi.
Rusiye Federatsiyasınıñ mahkemesi tarafından «Noman Çelebicihan batalyonında» iştirak etkeninde qabaatlanıp, sert rejimli koloniyada beş yıl qalmasına üküm etilgen Herson vilâyetiniñ 31 yaşında sakini Ruslan Abdurahmanov da Rusiye uquq qoruyıcıları tarafından işkencege oğratılğanını bildirdi.
«Agentstvo» Rusiye neşiri, Aqmescit SİZOsında işğal etilgen Ukrayına topraqlarında Rusiye ordusı ya da mahsus hızmetleri tarafından zapt etilgen 50-den 100-ge qadar ukrayınalı tutula, dep bildirgen edi.
Rusiye akimiyeti ve mahkemesi işğal etilgen topraqlarda ukrayınalılar tutulğanını tasdıqlay, lâkin sayısını aydınlatmay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
