Amerikanıñ teklifi Ukrayina-Rusiye cenkinde ateş toqtatılmasını közde tuta, ve bu, Cidde muzakerelerinde ukrayin tarafı aytqan deñizde ve avada ateş toqtatılmasına dair tekliftir, dep bildirdi saban ayınıñ 11-nde aqşam video muracaatında Ukrayina prezidenti Volodımır Zelenskıy.
"Amerika tarafı bizim delillerimizni añlay, tekliflerimizni qabul ete, taqımımıznıñ konstruktiv subeti içün prezident Trampqa teşekkür bildirmek isteyim. Bugün subetimizde Amerika tarafınıñ, ilk adımnı atmaq ve 30 künge ateşni toqtatmağa tırışmaq tek Qara deñizde degil de, bütün cebede ateş toqtatmaq teklifi bar edi", — dep qayd etti Ukrayina devletiniñ başı.
Zelenskıynıñ fikrince, şimdi "Amerika Birleşken Devletleri Rusiyeni barışıqqa razı olmağa mecbur etmeli"
"Böylece, biz razı olamız, ve rusiyeliler de razı olsalar, o vaqıt ateşni toqtav çalışıp başlaycaq", — dep qayd etti Ukraнina prezidenti.
Onıñ aytqanına köre, "bugün subetniñ müim elementi — Amerikanıñ Ukrayinağa mudafaa ve istihbarat yardımı bermege azırlığıdır".
Ukryaina tarafından muzakerelerniñ iştirakçisi, prezident Ofisiniñ yolbaşçısı Andriy Yermak, "adaletli barışıq bizim içün esas şeydir" ve "uzun müddetli barışıqnı isteymiz", dep qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
