2020 senesi rusiyeliler arasında Krasnodar ülkesi işğal etilgen Qırımdan daa populâr ola. Bunı Ozon.Travel Rusiye şirketiniñ tedqiqat malümatı köstere.
«100 biñden çoq seyaatçı fevral ve mart tatilini, mayıs tatilini ve atta yaz tatilini endi planlaştırdı. Eki yıldan berli eñ populâr yerler Aqmescit ve Soçi ola – amma 2019 senesiniñ başında Qırımğa daa faal kelseler, 2020 senesi daa çoq Krasnodar ülkesine bilet alalar», – dep bildire tedqiqat metnini TASS Rusiye haber agentligi.
Moskva kontrolindeki Qırım yolbaşçısı Sergey Aksenov 2019 senesi yarımadanı 6 mln 870 biñ kişi ziyaret etti, dep bildirgen edi.
Ukraina sıñırcıları, keçken senege baqqanda Herson vilâyeti ve Rusiye işğal etken Qırımnıñ memuriy sıñırında vatandaşlarnıñ sayısı deñişmedi, dep bildire.
