Rusiyeliler qanunsız faaliyetleriniñ delillerini işğal etilgen Qırımdan alıp çıqara. Bu aqta Ukrayina Cenüp mudafaa quvetleriniñ Birleşken koordinatsion matbuat merkeziniñ yolbaşçısı Natalâ Gumenük bildirdi.
"Şimdilik köpürden tayinatı üzre, yani naqliyat ve logistika içün faydalanalar, olar ve Halqara tribunalı içün qıymetli olğan er şeyni çıqarmağa tırışalar. Yani, olarnıñ qanunsız faaliyetini tasdıqlağan vesiqalarnı alıp çıqaralar. Olarğa qarşı qullanıla bilecek er şeyni yarımadadan mümkün qadar alıp keteler. Bundan da ğayrı ailelerini tahliye etmege devam eteler", - dedi Gumenük.
Onıñ sözlerine köre, Rusiye arbiyleriniñ bir qısmı da yarımadanı terk etmege tırışa, bunıñ içün olar tatilge çıqalar.
Spiker qayd etti ki, Rusiye yarımadadaki quvetlerini hususan da arbiy yedekler ve yaqıt anbarlarını dağıtmağa tırışa.
Ukrayina istihbaratınıñ temsilcisi Andriy Yusov Rusiye Federatsiyasınıñ arbiyleri işğal altındaki Qırımda bazı sıñırlarğa çekilüvini «ola bilecek bir stsenariy» olaraq köre. Onıñ aytqanına köre, Rusiye ordusınıñ böyle planları aqqında yarımada şimalindeki mudafaa inşaatları bildire.
Mayısnıñ 10-nda Azatlıq Radiosınıñ leyhası olğan Qırım.Aqiqat jurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti.
Obyektler arasında – infrastrukturalı arbiy uçaq alanları, gemi ve katerlerniñ yerleri, silâ anbarları, arbiy şeerçikler, arbiy bölükler, idare noqta ve ştabları, arbiy tehnika parkları ve ava mudafaa nevbetçilik yerleri, poligon ve oquv merkezleri, bazı arbiy-sanayı kompleksiniñ müessiseleri.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
