Rusiye akimiyeti ve RF arbiyleri Qırımda 19-ncı qanunsız askerlikke aluv kampaniyası çerçivesinde 15 biñ qırımlını Rusiye ordusına hızmetke çağırmağa niyetlene. Bu aqta öz menbalarına esaslanıp, Qırımtatar resurs merkeziniñ yolbaşçısı Eskender Bariyev Qırımda insan aqlarınıñ bozuluvı taliliniñ taqdim merasimi vaqtında bildirdi.
Bundan ğayrı, Bariyevniñ aytqanına köre, aprel 20-den Rusiye ordusına yañı seferberlşk dalğasını keçire bile. Bariyevniñ aytqanına köre, bu, "içtimaiy malümatqa" esaslanıp, acele hızmetke çağırış nasıl keçecegine bağlı.
"Bizim böyle iç malümatımız bar ki, aprelniñ 20-sinden başlap, olar qısmiy seferberlikni ilân ete ya da quvetleştire bileler. Bu esnasnı közetecekmiz. Bizge evelden berilgen malümat, acele hızmetke çağıruv nasıl keçecegine bağlı. Ne içün böyle bağ? Belki de, planlaştırılğan çağıruvnı insanlarğa añlaşmalarnı imzalamaqnı teklif etmek ve soñra olarnı Ukrayinağa qarşı cenkte qullanmaq içün qullanmaq imkânları ile bağlıdır", – dedi Bariyev.
O şunı da qayd etti ki, Rusiye quvetçileri tarafından Qırım faallerine qarşı açılğan davalar baqılğan vaqıtta Rusiye mahkemelerine kelgen insanlarğa celpname berilmesi mümkün.
Daa evel Rusiye prezidenti Vladimir Putin Rusiye ordusına baar arbiy hızmetine çağıruv aqqında fermannı imzaladı, dep haber etilgen edi. Çağıruv aprel 1-den iyül 15-ke qadar devam etecek.
Ukrayina prezidentiniñ Qırım Muhtar Cumhuriyeti ve Aqyardaki temsilciligi Qırımda Rusiye Silâlı quvetlerinde hızmet etmege mecbur etilgen Ukrayina vatandaşlarını bu aqta haber etmege çağırdı. Müessisede eminler ki, Qırımda bulunğan Ukrayina vatandaşlarınıñ askerlikke çağırılmamağa ıntıluvlarına baqmadan, Rusiye akimiyeti olarnı cinaiy taqip mehanizmleri vastasınen hızmet etmege mecbur etmege tırışacaq. 520 adise aqqında endi belli, olardan 206-sı 2022 senesi fevralniñ 24-nden soñ qayd etildi.
Ukrayina prezidentiniñ Qırım Muhtar Cumhuriyetindeki temsilciliginiñ malümatına köre, evelki 18 "qanunsız askerlikke aluv kampaniyası" devamında Rusiye Silâlı quvetlerine 44,5 biñ qırımlı askerlikke alındı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
