Budapeşt memorandumı muvafaqiyetsiz oldı, Rusiye diktatorlığı ise Ukrayinağa qarşı tecavuziy cenk başlattı, dep bildirdi memleketniñ tış işler naziri Andriy Sıbiga OSCE tış işler nazirleri şurasınıñ toplaşuvında.
"Rusiyeliler barışıq istegenlerini aytsa, yalan aytalar. Olar muzakereler aqqında yalıñız kerçek yapqanlarından diqqatnı ayırmaq içün aytalar. Sözlerine degil, areketlerine baqıñız. Asılında, Rusiye cenkni kenişletmege devam ete", — dep qayd etti Tış işler nazirliginiñ yolbaşçısı.
Sıbiğa qayd etti ki, Rusiye vatandaş ealisini daima raketa ve pilotsız ücümlernen qorquzmağa devam ete; energetik infrastrukturağa sistematik ücümler ve Zaporojjâ AES-niñ işğali sebebinden özek felâketini meydanğa ketirmege tırışa; İran ve KNDR-den silânı celp ete ve Ukrayinağa orta mesafeli ballistik raketalarnı endire.
"Bu areketler ciddiy bir cevap talap ete. Barışıq quvet sayesinde. Barışuvnen degil. Biz istilâcı içün cenk fiyatını arttırmalımız. Biz Moskvanı adaletli barışıqnı qabul etmege mecbur etmek kerekmiz. Şantajğa qarşı küç ve birlik numayışı yapmaq kerekmiz. Şimdi printsiplerimizni qorçalamaq vaqtı keldi, tek olarnı ilân etmek degil", — dep ayttı Sıbiğa.
Nazir qayd etti ki, Ukrayina topraq bütünligi, suvereniteti ya da kelecek telükesizligi boyunca iç bir uzlaşuvnı qabul etmeycek.
"Biz kerçek Rusiye barışıq planını kördik. Biz onı Buça, Mariupol, İzüm ve diger şeerlerde kördik. Rusiyeliler "barışıq" dep aytqanda, olar öldürilgen ukrayin vatandaşlarını, kütleviy mezarlıqlarnı ve viran etilgen şeerlerni közde tutalar. Ukrayin balalarını rus qorantalarına yollaylar ve olarğa rus adlarını bereler. Filtratsiya, atış cedvelleri, zorbalıqnen ruslaştıruv ve assimilâtsiya. Biz iç bir vaqıt böyle bir barışıqqa razı olmaycaqmız. Bizim barışıq planımız — Rusiyeniñ Ukrayinadan çıqıp, bizni raat qaldırmasıdır. Helsinki yekünleyici aktına tam uyğun olaraq", — dep qayd etti o.
Sıbiğa şunı da qayd etti ki, Rusiyeniñ OSCE-de iştiragi Avropada işbirlik içün telüke teşkil ete.
Daa evel Sıbiğa, Rusiyeniñ Ukrayina energetik infrastrukturasına ücümleri sebebinden peyda olğan özek telükesi aqqında aytıp, ortaqlardan qoşma ava mudafaası sistemalarını istegen edi.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
