Link açıqlığı

«Rusiyeli» Qırımğa qaytıp kelgen studentler migratsion kartını toldurmalı


Evge tatilge qaytqan qırımlı studentlerge 90 künge migratsion kartını toldurmaq kerek.

Bunı «Almenada» grajdan maarif merkeziniñ reisi muavini Valentina Potapova bildirdi, dep haber ete Gromadske radіo.

«Ukrainağa tasil almaq içün ketken qırımlı studentler vaqtınca yataqhanede yazılalar. Şimdi Qırım sıñırcıları içün olar ecnebiyler. Şunıñ içün migratsion kartında yarımadada bulunuvınıñ aşğariy müddeti — 90 kün yazılmalı. Eger bir aftalıq müddet yazılsa, problemler ola bilir. Tasavur etiñiz, student hastalanıp, vaqtında ketip olamaz. Böyle alda o, qanunlarnı boza ve oña kirişi Qırımğa yasaq ete bileler», – dey Valentina Potapova.

Valentina Potapova qırımlı studentlerde peyda olğan diger problemler aqqında da tarif etti.

«Vaqtınca işğal etilgen territoriyalar aqqında» umumiy qanun bar. Olarğa Qırımda qalğan ve qıtağa köçip ketken vatandaşlarnıñ aqları kefil etile. Aq ve serbestliginiñ kefaleti aqqında qısımda studentlerniñ tasil aqqı kefil etile. Faqat qanun umumiy ve yaşayışnıñ çeşit adiselerini idare etmey. Tasil nazirligi studentlerde peyda olğan problemlerni qoşma sürette idare etmeli», – dey mütehassıs.

Qırımda yüz bergen bu vaziyetten evel studentler bir aliy oquv yurttan digerine tek yılnıñ soñuna keçe bile edi. Siyrek allarda — semestriniñ soñunda. Başta qıtada aliy oquv yurtlarına studentlerini vesiqasız qabul ete ediler, Çünki Qırım aliy oquv yurtları studentleriniñ başqa universitetlerge keçüvine keder etmege tırışa edi. Studentler şimdi mahkemege davalarnı bereler.
XS
SM
MD
LG