«Evelden azırlanıñz, yanıñızğa em ruble, em grivnalarnı alıñız»,– dep qoştı qadın.
Fiyatlarnıñ paalılaşuvı aqqında vokzalnıñ nevbetçisi de bir şey bilmey. Qırım.Aqiqat mühbiriniñ sualine nevbetçi bugünge fiyatlarnıñ köterilüvi boyunca iç bir avale olmağanını ayttı.
«Er kün bir şeyler deñişe. Şimdi eminliknen aytam, fiyatlarnıñ paalılaşuvı aqta bir şey bilmeymiz. Yarın ne olacaq aytıp olamayım», – dedi nevbetçi.
Hatırlatamız, «Ukrzaliznitsâ»da şunı bildireler ki, mında fiyatlarnı kimse deñiştirmedi ve Rusiye tarafından bu aqta iç bir malümat almağan ekenler.
«Rusiye demir yolundan iç bir resmiy bildirüv yoq edi. Biz şimdi taqiqat keçiremiz. Bundan soñ neticelerni aşkâr etermiz», – dep ayttılar Qırım «akimiyeti»niñ ruporı olğan Krıminform saytına müessiseniñ matbuat hızmetinde.
Qırım demir yollarınıñ malümat hızmetinde ise fiyatlarnıñ aqiqaten paalılaşuvı aqqında bildireler.
«Bugünden Aqmescitten Kiyevge platskart yeri – 2330 ruble, kupe – 3370 ruble tura. Bu al Rusiye elektron tertibatı qoyulması ile bağlı, o avtomatik şekilde böyle fiyatlarnı belgiley», – dep bildireler mında.
Aynı zamanda içtimaiy ağlarda iyün 10-11 künleri eski fiyatlar boyunca satın alınğan biletlerniñ fotoları peyda oldı. Buña baqmadan, içtimaiy ağlarnıñ qullanıcıları endi qasevet çemege başlaylar.
