Rusiye kontrolindeki Qırım yolbaşçısı Sergey Aksenovnıñ bildirgenine köre, yarımadada koronavirus hastalarını tedaviyleycek 70-ten çoq ekimniñ qomşu Rusiyeden kelmesi beklenile. Onıñ aytqanına köre, ekimlerniñ bir qısmı endi Qırım hastahanelerinde işke başladı.
«Bu zor zamanda cumhuriyetimizge yardım etken Rusiye Federal tibbiy-biologik agentliginiñ hadimlerini Qırım toprağında selâmlamaqtan şeref duyam. Ekimlerniñ bir qısmı №7 Aqmescit şeer hastahanesiniñ kövid gospitalinde endi çalışa, umumen Qırım Cumhuriyetine 70 mütehassısnıñ kelmesi beklenile», – dep yazdı o, Facebookta.
Aksenovnıñ malümatına köre, ekim gruppaları ekişer afta çalışacaq, soñra deñiştirilecek.
Qırımnıñ felâketler tibbiyeti merkezi ekimler yetmey, dep bildirdi. Qırımnıñ cenübiy yalısında kurort mevsimi vaqtında ekimler yetmey.
Faqat bu problem yalıñız bu region içün has degil. Qırımnıñ Rusiye ükümeti sağlıq nazirligi koronavirus hastalarınen çalışacaq ekimlerni işke davet ete.
Rospotrebnadzor, Qırımda koronavirus hastalarınıñ sayısı arta, dep qayd etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
