İyülniñ 24-nde saba Aqyarda yañı altı COVID-19 hastası bar, dep bildire Aqyarnıñ Rusiye ükümeti.
«Beş insan Aqyarğa Rusiyeniñ diger regionlarından keldi. Daa evel hastalanğan adamnıñ yedi yaşında oğlu da hasta oldı. Yahşı olğan daa altı kişi hastahaneden çıqarıldı», – dep aytıla haberde.
Akimiyetniñ malümatına köre, Aqyarda yılnıñ başından 312 insan koronavirus yuqunçına oğradı. al-azırda 45 kişi hastahanede yata. 251 insan tüzeldi, 6 kişi vefat etti.
«Bugünki künde 139 insan yuqunç hastahanesinde közetile, №9 şeer hastahanesinde – 152. 506 insan yaşağan yerinde közetile», – dep aytıla haberde.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
