Ukraina Devlet sıñır hızmetiniñ yolbaşçısı Petro Tsigikal bildirdi ki, cenk vaziyeti devam etkence Ukrainağa 16 yaşından 60 yaşına qadar Rusiye erkek vatandaşları alınmaycaq. Bunı o, noyabrniñ 30-nda Ukraina prezidenti Petro Poroşenko reisligi altında cenk vaziyetini ilân etmek fermanı ve qanunını yerine ketirüv tedbirleri toplaşuvı vaqtında bildirdi.
«Keçiş noqtalarında kontrol tedbirleri quvetleştirildi. Bugünki künde çetel vatandaşları, hususan Rusiye Federatsiyası vatandaşlarınıñ kirmesi sıñırlandı. 16 yaşından 60 yaşına qadar Rusiye erkek vatandaşları kirsetilmey», – dep bildirdi Petro Tsigikal.
Aynı vaqıtta UDSH yolbaşçısı qayd etkenine köre, Ukraina vatandaşlarına nisbeten sıñırlav yoq.
Ukraina Devlet sıñır hızmeti, al-azırda işğal etilgen Qırımğa ancaq Ukraina pasportlarınen kirmek mümkün, dep bildirgen edi. Çetel vatandaşları yarımadağa alınmay.
Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Cenk vaziyeti on vilâyette ilân etile – Odesa, Mıkolayıv, Herson, Zaporijjâ, Lugansk, Donetsk, Sumı, Harkiv, Çernigiv, Vinnıtsâ vilâyetlerinde.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Kreml kontrolindeki Aqmescitniñ Kiyev rayon mahkemesi 21 Ukraina deñiz askerini 2019 senesi yanvarniñ 25-ne qadar apiske aldı. Keriç hastahanesinde bulunğan daa üç deñizcini Keriç şeer mahkemesi apiske aldı. Olar da 2019 senesi yanvarniñ 25-ne qadar apiste qalacaqlar. Ukraina deñizciler 6 yılğa azatlıqtan marum qala bile.
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
