Link açıqlığı

Saatnıñ esas haberi

Rusiyeden Aqmescit SİZOsına ketirilgen Gafarov ilâcsız qala – advokat


Aqmescitteki SİZO
Aqmescitteki SİZO

Yaqında Rostov SİZOsından Aqmescitke ketirilgen Aqmescitteki ekinci «Hizb ut-Tahrir davasınıñ» mabüsi Cemil Gafarovğa alâ daa ilâc berilmedi, dep bildire advokatı Rifat Yahin. O, Gafarovnı Aqmescit SİZOsında ziyaret etip, müvekkiliniñ alı fenalaşqanını qayd etti.

«Qırımğa ketirilgen soñ alı fenalaştı, lâkin yazda Rostov tibbiyeti tedqiqlerden soñ böyle büyrek ve yürek hastalıqları olğan insan SİZOda tutula bile, dep qarar çıqarğan edi», – dep yazdı advokat Facebookta.

«Bunıñnen beraber, tahqiqat izolâtorınıñ memuriyeti Gafarov C.A.-ğa tuvğanları ketirgen ayatı içün kerekli ilâclarnı alâ daa bermey», – dep qoştı o.

Advokatnıñ malümatına köre, bu ilâclar Gafarovnıñ üzviyetinden zeerlenüvni çıqarmaq ve yürek işine yardım etmek içün kerek. Bu ilâclar azatlıqta berilgen ve apiste ekim komissiyası qararında tevsiye etilgen edi.

Rusiye müessiseleri işbu malümatqa şimdilik seslenmedi.

Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov ve Asan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.

Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG